Në kryeqytetin e Maqedonisë së Veriut, Shkup, është mbajtur aktiviteti i 9-të i Ditëve të Anestezisë në shtetet e Ballkanit.

Aktiviteti u mbajt në bashkëpunim me Agjencinë Turke për Bashkëpunim dhe Koordinim (TIKA), Shoqatën e Specialistëve të Anesteziologjisë dhe Reanimacionit (ARUD), Shoqatën Maqedonase të Anesteziologëve dhe Mjekësisë së Kujdesit Intensiv (MSA) dhe Universitetin Ndërkombëtar Ballkanik (IBU).

Rreth 190 profesionistë të kujdesit shëndetësor nga vendet e Ballkanit, veçanërisht nga Türkiye dhe Maqedonia e Veriut, morën pjesë në këtë aktivitet, tema kryesore e të cilit ishte "Gatishmëria për fatkeqësitë në anestezi dhe kujdes intensiv".

Programi u përqendrua në qëndrueshmërinë e sistemeve shëndetësore në drejtim të fatkeqësive, pandemive dhe krizave humanitare në rritje në shkallë globale ndërsa u diskutua edhe planifikimi i shërbimeve të anesteziologjisë dhe kujdesit intensiv në situata fatkeqësishë, menaxhimi i burimeve, strategjitë e reagimit të shpejtë dhe mekanizmat e bashkëpunimit ndërkombëtar.

Gjithashtu, zhvillimet aktuale shkencore në fushat e anesteziologjisë, kujdesit intensiv dhe reanimacionit u vlerësuan me një qasje ndërdisiplinore.

Qëllimi i paneleve, konferencave, prezantimeve shkencore dhe trajnimeve praktike klinike, të cilat u zhvilluan me kontributet e akademikëve dhe mjekëve specialistë, ishte të zhvillonin strategji të përbashkëta për përgatitjen për fatkeqësitë në shkallë rajonale dhe globale.

Eventi krijoi bazë të fortë për politika të përbashkëta shëndetësore dhe bashkëpunime akademike si dhe për rritjen e ndërveprimit profesional midis vendeve të rajonit.

Në fjalimet hapëse të kongresit, u theksua rëndësia e solidaritetit shkencor dhe koordinimit të shërbimeve shëndetësore në kohë krize si dhe u nënvizuan kontributet në zhvillimin e bashkëpunimit shkencor ndërkombëtar dhe forcimin e sistemeve shëndetësore, veçanërisht në rajonin e Ballkanit.

Ky kongres, i organizuar me mbështetjen e TIKA-s, është një takim i rëndësishëm shkencor që forcon diplomacinë shëndetësore midis Türkiyes dhe vendeve të rajonit dhe rrit kapacitetin e gatishmërisë ndaj fatkeqësive.

Në mbyllje të programit TIKA-s iu nda një mirënjohje për mbështetjen e ofruar.