Aktualisht nuk ka prova që ndërprerjet e energjisë elektrike në Spanjë dhe Portugali janë të lidhura me një sulm kibernetik, tha të hënën Presidenti i Këshillit Evropian Antonio Costa.

Costa njoftoi se ka zhvilluar bisedë telefonike me kryeministrin spanjoll Pedro Sanchez dhe kryeministrin portugez Luis Montenegro në lidhje me ndërprerjen masive të energjisë që ka prekur të dy vendet.

"Operatorët e rrjetit elektrik në të dy vendet po punojnë për të gjetur shkakun dhe për të rivendosur furnizimin me energji elektrike", shkroi ai në rrjetin X.

Ai shpjegoi se "për momentin nuk ka indikacione se ky është një sulm kibernetik".

Presidentja e Komisionit Evropian, Ursula von der Leyen, foli gjithashtu me Sanchez, duke konfirmuar mbështetjen e KE-së në monitorimin e situatës së bashku me organet kombëtare dhe evropiane dhe Grupin e Koordinimit të Energjisë Elektrike.

“Ne do të koordinojmë përpjekjet dhe do të ndajmë informacione për të ndihmuar në rivendosjen e sistemit të energjisë elektrike dhe kemi rënë dakord të qëndrojmë në kontakt të vazhdueshëm”, shkroi von der Leyen në rrjetin X.

Operatori spanjoll i energjisë Red Electric njoftoi dje se pret që ndërprerja e energjisë elektrike të zgjasë midis gjashtë dhe dhjetë orësh.

Ndërprerjet e energjisë elektrike ndodhën në të gjithë Portugalinë, Spanjën dhe Andorrën rreth mesditës së së hënës, me pjesë të Francës të prekura gjithashtu.