Brigjet e mbuluara nga dielli, thesaret arkeologjike të përjetshme dhe një mozaik unik kulturor ku takohen Europa me Azinë, e kanë çuar sektorin e turizmit në Türkiye në nivele rekord.

Këtë vit, pritet që sektori të kontribuojë me rreth 5,2 trilionë lira turke (afërsisht 135.35 miliardë dollarë) në ekonominë kombëtare, rreth 12 për qind të Produktit të Brendshëm Bruto, sipas të dhënave nga Këshilli Botëror i Udhëtimeve dhe Turizmit (WTTC).

Në një raport të ri, WTTC-ja parashikon një rritje sektoriale prej mbi 5,2 miliardë dollarësh krahasuar me vitin e kaluar, ndërkohë që drejtoresha ekzekutive e tij, Julia Simpson, vlerësoi qasjen strategjike të Türkiyes për promovimin e turizmit.

Duke folur për Agjencinë Anadollu, Simpson tha: “Vizioni i Türkiyes ka qenë i rëndësishëm në nxitjen e rritjes së turizmit dhe ka qenë shumë e rëndësishme që Türkiye e ka vendosur veten në hartë si një destinacion turistik. Turkish Airlines fluturon drejt më shumë destinacioneve se çdo linjë tjetër ajrore në botë, dhe kjo do të thotë që Türkiye është shumë mirë e lidhur. Dhe lidhja është shumë e rëndësishme", tha ajo.

“Türkiye është gjithashtu një vend i sigurt; udhëtarët duhet të ndihen të sigurt dhe Türkiye është një vend i mirë dhe i sigurt për t’u vizituar”, shtoi Simpson.

“Pastaj keni bukuritë natyrore, Türkiye është shumë e bukur. Sidomos bregdeti i Antalias është vërtet spektakolar. Dhe historia, dhe të gjitha antikitetet. Është me të vërtetë vendi ku perëndimi takohet me lindjen.”

Studimi i WTTC-së parashikon që, si turistët vendas ashtu edhe ata të huaj do të kontribuojnë në këtë rritje. Shpenzimet e vizitorëve të huaj pritet të arrijnë në 67,7 miliardë dollarë në vitin 2025, duke reflektuar popullaritetin në rritje të Türkiyes në skenën globale.

Ndërkohë, shpenzimet e vizitorëve vendas pritet të arrijnë në 36,5 miliardë dollarë, duke theksuar tregun e gjallë të turizmit të brendshëm në vend. Raporti gjithashtu parashikon që industria e udhëtimeve dhe turizmit do të mbështesë 3,3 milionë vende pune në të gjithë Türkiyen këtë vit, duke përbërë më shumë se 10 për qind të punësimit total.