Gjatë vizitës së Presidentit amerikan Donald Trump në Lindjen e Mesme nga 13 deri më 16 maj, ushtria izraelite vrau rreth 400 palestinezë në Rripin e Gazës, përfshirë gra dhe fëmijë, sipas Ministrisë së Shëndetësisë palestineze.
Sipas Ministrisë, 78 persona u vranë në tre ditët para vizitës së Trump në rajon, duke treguar përshkallëzim të ndjeshëm të sulmeve.
Mediat lokale izraelite raportuan më 5 maj se kabineti i sigurisë izraelit kishte diskutuar një plan sulmi që synonte zgjerimin e pushtimit në Rripin e Gazës.
Një zyrtar i lartë pa emër tha se kabineti i sigurisë miratoi në mënyrë unanime planin. Pas kësaj date, sulmet izraelite ndaj Gazës u intensifikuan.
Ditë gjakderdhjeje në Gaza
Trump nisi turneun në Arabinë Saudite më 13 maj, vijoi në Katar më 14 maj dhe mbërriti në Emiratet e Bashkuara Arabe më 15 maj.
Që nga fillimi i turneut të Presidentit amerikan, ushtria izraelite nisi sulme të forta ndaj disa qendrave mjekësore, përfshirë Spitalin Nasser dhe Spitalin Evropian të Gazës, si dhe zonave banimi dhe objekteve civile.
Në ditën e parë të turneut, ushtria izraelite dha urdhër evakuimi për shtatë zona, përfshirë lagje të populluara si Jabalia, Tel al-Zaatar, Sheikh Zayed dhe al-Salam në veri të Gazës.
Zëdhënësi i ushtrisë izraelite, Avichay Adraee, e përshkroi paralajmërimin si “paralajmërimin e fundit para sulmit.”
Pas paralajmërimit, bombardimet vranë dhe plagosën shumë njerëz, përfshirë gra dhe fëmijë.
Po atë ditë, goditjet me artileri synuan edhe Spitalin Nasser dhe Spitalin Evropian të Gazës, si dhe shtëpi dhe tenda ku strehoheshin njerëz të zhvendosur. Rreth 48 persona u vranë në ato sulme.
Në ditën e dytë të vizitës së Trump, bombardimet izraelite synuan shtëpi, civilë dhe tenda për të zhvendosurit vranë rreth 118 palestinezë.
Gjithashtu, u dhanë urdhra evakuimi për katër shkolla në qytetin e Gazës dhe për zona banimi, përfshirë edhe Spitalin al-Shifa.
Në ditën e tretë të vizitës së Trump, të enjten, sulmet ajrore izraelite goditën shtëpi dhe tenda të të zhvendosurve, si dhe një qendër shëndetësore dhe një xhami në zona të ndryshme të Rripit të Gazës, duke vrarë rreth 94 palestinezë.
Në Gaza, e cila është nën bllokadë izraelite prej 18 vitesh dhe ku jetojnë mbi 2 milionë njerëz, rreth 1,5 milionë palestinezë kanë mbetur të pastrehë për shkak të sulmeve.
Si pasojë e bllokadës së ndihmës humanitare të vendosur nga Tel Avivi që nga 2 marsi, Rripi i Gazës po përballet gjithashtu me një krizë urie.
Trump: “Banorët e Gazës meritojnë një të ardhme më të mirë”
Të martën, Izraeli intensifikoi bombardimet, aktet e gjenocidit dhe vrasjet, ndërkohë që Trump, gjatë një fjalimi në Arabinë Saudite, tha se palestinezët në Gaza “meritojnë një të ardhme më të mirë.”
Palestinezët e panë këtë si një mesazh të drejtpërdrejtë nga Kryeministri izraelit Benjamin Netanyahu për të shmangur presionin diplomatik për armëpushim.
Në një deklaratë të enjten, Hamasi tha se Netanyahu po përpiqet të sabotojë përpjekjet e ndërmjetësve për një armëpushim dhe një marrëveshje për shkëmbim të të burgosurve, duke rritur sulmet dhe masakrat kundër civilëve të pafajshëm në Rripin e Gazës.
Deklarata i përshkroi sulmet si pjesë të një gjenocidi të vazhdueshëm që synon civilët, duke theksuar se bombardimi i zonave të banuara me banorë është një qasje “brutale, fashiste” që nuk do t’i sjellë fitoren Netanyahut.
Hamasi përsëriti gatishmërinë për të hyrë në negociata gjithëpërfshirëse, duke propozuar lirimin kolektiv të robërve izraelitë në këmbim të ndalimit të gjenocidit, tërheqjes së forcave izraelite dhe lirimit të të burgosurve palestinezë.
Netanyahu, duke shtuar kushte të reja, ka shmangur procesin dhe vazhdon të këmbëngulë për çarmatimin e Hamasit, një kërkesë që grupi e refuzon për sa kohë që Izraeli vazhdon pushtimin e tokave palestineze.
Ndërkohë në Izrael, figura të opozitës dhe familjarë të të burgosurve akuzojnë Netanyahun për zgjatjen e gjenocidit në Gaza për të kënaqur krahun ekstremist të qeverisë së tij, duke pretenduar se veprimet e tij udhëhiqen vetëm nga interesa politike personale, veçanërisht dëshira për të mbetur në pushtet.
