Presidentja e Republikës së Kosovës, Vjosa Osmani, e cila po përfaqëson Republikën e Kosovës në samitin e gjashtë të liderëve të Komunitetit Politik Evropian (EPC), është takuar me Përfaqësuesen e Lartë të BE-së, Kaja Kallas.

“Kënaqësi të takohem me Përfaqësuesen e Lartë të BE-së, Kaja Kallas, një mbështetëse e kahmotshme për një Evropë të sigurt e të bashkuar. Duke qenë se gjatë vizitës së saj javën e ardhshme në Kosovë do të jem në një vizitë shtetërore të paracaktuar jashtë vendit, takimin e realizuam në Tiranë”, shprehet Osmani në një postim në rrjetet sociale. 

Presidentja theksoi se Kosova është e gatshme për hapin e radhës në rrugën e saj drejt Bashkimit Evropian.

 “Është koha që BE t’i përgjigjet këtij momenti me guxim, qartësi dhe vendosmëri, tipare këto që e karakterizojnë lidershipin e Përfaqësueses së Lartë Kallas”, deklaroi Osmani pas takimit.